UN-in buaina thlenna hmun tlawh turin Suu Kyi-i ngen

United Nations chuan Myanmar State Counsellor Aung San Suu Kyi-i chu an ram hmarlam a, Rohingya Muslim-ten kut an tawrh fona hmun chu tlawh turin a phut.

Myanmar hmarthlang lam Bangladesh ramri, Rakhine state-ah hian Buddhist leh Muslim-te inkarah buaina a thleng fo a ni. October 9 khan border post beih a ni a, police officer pakua an thi. He thil thlengah hian Rohingya Muslim pawl ṭhenkhat puh an ni a, pawikhawihtute dapchhuak tur hian sipai tam tham tak tirh luh nghal a ni.

Sipaite hian Rohingya Muslim tam tak chu an in te halsakin, hmeichhiate an pawngsual a, civil mi eng emaw zat an that nia sawi a ni. Mahse an puhna hi Myanmar sorkar leh sipaite chuan an pha thung.

U.N. Secretary-General Ban Ki-moon-a special advisor, Vijay Nambiar chuan Rakhine biala thil thlengah Myanmar sorkar chuan a tih tur a ti tawk lo tih a sawi. Sorkarin tualchhung mite himna tur ngaihtuah lam aia an sipaiten venna lam a dah pawimawh zawk chuan ramdangte pawhin ṭha an ti lo a ni, a ti.

Rakhine state-a sipaiten beihpui an thlak hnu hian mi 86 an thi a, Rohingya Muslim 10,000 chuang chu Bangladesh ramah an tlanchhe tawh bawk.