Trump leh Xi te inbia

US president Donald Trump leh China president Xi Jinping te chu Nilaini khan telephone-in an inbia a; Iran dinhmun bakah US-China inlaichinnaa harsatna awmte leh, Trump-a'n April thlaa China tlawh a tum chungchangte an sawi dun.

China President nena an inbiak thu hi Trump chuan a social media-ah tarlangin, China bakah a mimal tak pawhin President Xi nena an inlaichinna a ṭha a, inpawhna ṭha tak neih zui zel pawh ṭha an tih thu a sawi. China sorkar pawhin ram pahnih hruaitute hian summit lian tham lo awm turte, an inhmuh theih hun turte pawh an sawi dun tih an tarlang. Mahse, April thlaah Trump-a'n China tlawh a tum thu erawh an sawilang tel lo.

Trump leh Xi hi nikum November thla hnua an inbiak lehna hmasa ber a ni. Hemiṭum hian insumdawn tawnna, Russia leh Ukraine indona thleng mek bakah Taiwan chungchangte an sawi dun a ni.

Nimina an inbiaknaah hian Xi chuan China-US inlaichinna kawngah Taiwan chungchang chu thil pawimawh tak a ni tih Trump hi a hrilh. China hian mahnia inrelbawl hran, Taiwan hi a ram chinah a ngai a, hei vang hian ram dang inrawlh hi a ngaithei lo a ni. Hetih laiin US chuan kum eng emaw chen Taiwan ram in inzawmna ṭha tak a neihpui tawh a, palai pawh intir tawnin ralthuamte pawh a leitir fo a, Taiwan hnena ralthuam hralhtu lian ram pahnihna a ni phah. Nikum December thla pawh khan Trump chuan Taiwan hnenah ralthuam USD tld 11 hu an hralh dawn tih a lo puang tawh a, hei hi China lam chuan a ngaimawh thung hle.