Jerusalem-a embassy sawn turin ngen

Israel education minister Yoav Kisch leh Israel-a US ambassador Mike Huckabee te chuan ram hrang hrangte chu Israel-a an embassy chu Jerusalem khawpuia sawn turin an ngen.

Jerusalem-a International Conference on Artificial Intelligence and Innovation in Education neihnaa tel, ram hrang hrang education minister leh technology company senior executive-te hmaa thu a sawiah, Kisch chuan Jerusalem chu hman lai aṭang tawha Israel a nia , eng vang mahin khawpui hi ṭhen a ni dawn lo tih a sawi. Ram dang palaite chu an sorkar pawh nawr a, Jerusalem-ah an embassy te sawn tir turin a sawm.

He huna tel, US ambassador Huckabee pawhin minister thusawi hi a thlawp thu a tarlang a, ram dang pawhin an zawm a beisei thu a sawi. US chuan kum 2018 khan Tel Aviv aṭangin Jerusalem-ah embassy hi a sawn tawh a, hei hi thil tih tur pawimawh tak a ni, a ti.

Israel rama ram dang embassy tam zawk hi Tel Aviv khawpuiah an awm a ni. US president Donald Trump chuan a president term hmasa zawk, kum 2018-ah khan Jerusalem-ah US embassy chu a sawn a; mahse, ram dang zawk chuan Jerusalem pumpui chu Israel thuneihna hnuaia awma an pawmsak loh avangin Tel Aviv-ah an embassy te an la dah chhunzawm a ni. UK chuan Jerusalem-a British Consulate General a dah a, mahse, Tel Aviv-ah embassy chu a la dah chhunzawm tho thung.