Khawvel Lawrkhawm

Congo-a gold mine chimah mi 20 an thi

Democratic Republic of Congo ram hmarchhak lam, Mongwalu-a rangkachak khur chimah hnathawktu mi 20 an tih.

Pathianni zan khan South Kivu biala gold mine hi a chim a, a chim lai hian hnathawk eng emaw an awm. Khur chim vang hian mi 20 an thi a, thi zat hi an la pun chhoh rin a nih thu province mines minister Apollinaire Bulindi chuan a sawi. Congro ramah hian rangkachak khur chim vangin chhiatna a thleng fo a, nikum khan mi 15 chu khur an laih laia chim avangin an thi a ni. Dan loa rangkachak khur laih pawh a tam a, hengte hi helpawlte chuan sum lakluhna hnar ber atan an hmang a ni.

Russia sipai thlawhtheihna Ilyushin a tla

Russia sipai thlawhtheihna, Ilyushin Il-18 chu Siberia hmarchhak lamah nimin zing khan a tla.

Russia Defence Ministry chuan thlawhtheihnaa chuang mi 23 zingah thi an awm lo a, mi 16-te erawh chuan hliam na tak an tuar niin a sawi. Thlawhtheihna hi Sakha Republic-a Tiksi khaw airfield aṭanga km 30 vela hlaah a tla a, a tlakna hmunah hian Russian Emergencies Ministry chuan Mi-8 helicopter pathum a tir nghal a ni. He thlawhtheihna hi Russian Aerospace Forces a ni a, officer-te a phur a ni.

Tualchhung buaina thlennaah naupang mtd 220 cheng mek

United Nations chuan ram hrang hranga tualchhung buaina thlenna ram 20-ah naupang maktaduai 220 chuang an cheng mek niin a sawi.

Secretary General Special Representative for Children and Armed Conflict, Leila Zerrougui chuan tualchhung buaina thlen mekna ram zingah hian Arab ram pariat leh Africa ram pariat a tel tih a sawi. Heng buaina hmun aṭanga tlanchhia hi mi maktaduai 65 an tling tawh a, an zingah hian naupang maktaduai 28 an tel a ni.