US-in IS hotu lu man tipung

US chuan Islamic State (IS) firfiak pawl hotu, Al-Baghdadi lu man atana a phal zat chu dollar maktaduai 25-ah a tipung.

Department of State chuan thuchhuah siamin, IS hotu lu man tihpun a nih thu hi a sawi. Al-Baghdadi lu man atana phal zat hi kum 2011-a al-Qaida firfiak pawl hotu Osama bin-Laden lu man nen a inzat a ni. Bin Laden hi kum 2011 May thla khan NAVY SEALS team-in Pakistan-ah an kaphlum a, sorkarin a lu man atana a phalzat hi tumahin an tel lo a ni.

ìAmerica ram leh America mipuite himna hi kan ngai pawimawh ber a, IS firfiakte dolet hna hi na zawkin kan kalpui mek a ni. Hei vang hian an hotu lu ber chinchang kan hriat theihna tur hian huang kan zuah ta a niî tiin State Department chuan a tarlang.

Al-Baghdadi man a nih theih nana a awmna chin hrilh thei hnenah US dollar maktaduai 10 lawmman pek phal a nih thu puan a nih aṭang khan IS hotu hi a hlauhawm zual hle niin State Department chuan a sawi. ìBaghdadi hi Middle East-a civil mi sang tel thihnaah khan mawhphurtu a ni a, Japan, United Kingdom leh US mi an mante rawng taka tihhlum an nihnaah pawh a mawhphurtu ber a niî a ti. Kum 2011 aṭang khan Iraq rama firfiakte pawikhawihna thleng hrang hrangah a bultumtu ber chu Al-Baghdadi a nih thu a sawi.

Al-Baghdadi hi Department of State chuan Specially Designated Global Terrorist zingah a dah a, United Nations Security Council sanctions committee list-ah pawh telh a ni bawk. US official-te chuan firfiakte an beih letnaah Baghdadi hi hmelma No. 1 ah an dah a ni.

Baghdadi hi mipui hmaah inlan ngai lo mah se, video leh audio message hmangin midangte vauna leh an pawl member-te fuihna thuchhuah a tichhuak ṭhin.