Aleppo-a chengte thiar-chhuah hna chhunzawm

Syria sorkar leh helten Aleppo khuaa inkahhai an puan hnuah khawchhunga cheng mi tam tak chu thiarchhuah chhunzawm zel an ni.

Aleppo khawpui chhak lam, helho awmna biala chengte chu bus leh ambulance hmangin thiarchhuah an ni a, Pathianni zan khan mi 350 chu thiarchhuah an ni. Mi sang telin hruaichhuah hun hi an nghak a, an zingah hian damlo leh naupang tam tak an tel.

UN official chuan mipuite thiarchhuah hna hi chhunzawm zel a nih thu a sawi a, helho kuta awm mek Khan al-Assal-ah bus pathum tirh luh a ni tih sawiin, he hmuna chengte hi Aleppo leh Idlib province-a sorkar kuta awm khuaahte hruai tum an ni. Sorkar thlawptu lamte chuan Shia khua, Foah leh Kefraya-a chengte pawh an khua chhuahsan phal turin an phut bawk. Pathianni khan heng khuaa chengte thiar tura tirh bus panga vel chu helho nia hriatten an hal. Bus hi damlo leh hliam tuarte phur tura tirh an ni.

Al-Qaida firfiak pawl nena inzawmna neia puh, Jabhat Fatah el-Sham helpawl chu pawikhawihna thlengah hian mawhphurtuah puh an ni. Lebanon helpawl, Hezbollah chuan Fatah al-Sham leh civil mite thiarchhuah thlawptu, Islamist helpawl te inbeihnaah kangmei hi a chhuak niin a sawi.