Civil mite laka pawikhawihah Myanmar sipai puh

Human Rights pawl lian tak Amnesty International chuan Myanmar sipaite chu an rama Rohingya Muslim-te chunga pawikhawihna thlenah a puh.

Amnesty-in report a tihchhuah tharah chuan, Myanmar sipaite chu civil mite that ṭhin, pawngsual, nghaisa leh an thil neihte ruk sakah a puh a ni. Mahse sipaite chuan civil mite chunga pawikhawihna thlena an puhna chu thu dik lo a nih thu an sawi a, Rakhine state-ah chuan helho lakah chauh beihpui thlak a ni, an ti.

Rakhine state-a tharum thawhna thleng chungchang hi ASEAN hruaitute chuan Yangon-ah an lo sawiho tawh bawk.

Report-a tarlan danin, October thlaa Rakhine state-a sipaiten hel laka beihpui an thlak aṭangin tharum thawhna hi a thleng a ni. Sipaiten hian hel nia hriatten border police-te an beih hnuah beihpui hi an thlak a, Rohingya-te chu a bitum bik nia sawi a ni.

Amnesty chuan sipaite kut tuartu mi 35 te an kawm thu sawiin, Rakhine state-a sipaite chet dan chu a rapthlak hle niin a sawi. Sorkar thupekin mi an that a, tam tak an hreng a, pawngsual, innghaisak leh in leh lo tihchhiatsakte pawh a thleng nasa a, chenna in 1,200 bakah school leh mosque-te pawh halsak an ni, a ti.

Rakhine state-a inbeihna thlengah hian thi zat chiah hriatchian a ni lo a, Amnesty chuan buaina chhuah hnu hian Rohingya mi 27,000 chu Bangladesh ramah an tlanchhe tawh tih a sawi. Mahse Bangladesh sorkar chuan an rama raltlan lut tam tak chu alo hnar niin a sawi bawk.