Japan inthlanpuiah rorellai LDP chak

Japan ram inthlanpui, Pathiannia neihah prime minister Sanae Takaichi kaihhruai, rorellai conservative Liberal Democratic Party chu hneh taka thlan tlin a ni.

LDP hian Parliament lower house-a seat awm, 465 aṭangin seat 316 a la pha a, kum 1947-a Japan parliament din a nih hnua party malin seat awm zat hmun thuma ṭhenna hmun hnih an lak phak vawi khatna a ni. LDP thawhpui, Japan Innovation Party chuan seat 36 la bawkin, party pahnih thawk dun hian seat 352 an la tling a ni.

Inthlana hnehna an chan hnuah, PM Takaichi chuan fiscal policy chu na taka kalpui a tum tih sawiin, a cabinet pawh siksawi a tum lo tih a sawi. Nikum October thla khan Japan Iron Lady tia sawi, kum 64 mi Takaichi hi Japan hmeichhe prime minister hmasa ber ni tura lak luh a ni. Inthlanah hneh taka thlan tlin an nih leh tak avangin a policy-te pawh House-ah eptute pawmpuina tel lo pawhin a kaltlangpui thei dawn a ni.

Japan ramah thil man leh in luah mante a sang chho hle a, hei bakah nau piang zat an tlakhniam zel avangin kum upa lam an tam a, hnathawk thei zat an tlahniam zel a, kum upa zawkte enkawlna lamah pawh sum sen a tam zel a ni. Takaichi hian an ram economy siamṭhat leh a tum ber a ni tih sawiin, chhiah lak tihhniam a, nitin khawsak hautak lutuk pawh tihziawm a tum a ni. Market commentator-te chuan Takaichi policy hian Japan economy dinhmun a siamṭhat phah hle an ring.

Conservative ruh tak, PM Takaichi hi mahni anpui nena inneih dodaltu lian tak a ni. Thuneihna a chan hnuah US nena inzawmna nghet tak chu a hmalaknaah a tel a, US president Donald Trump nen pawh inhmuin, tun ṭum inthlanah hian Trump pawhin Takaichi hi a thlawp hle a ni. Motorbike lawm tak a ni a, heavy metal drummer a ni ṭhin bawk. Hei vang hian ṭhalai lamah pawh a tlak nat phah a ni. Hetih lai hian China-in Taiwan awp a tum a nih chuan Taiwan chhan nan Japan-in a sipaite a inrawlh tir ang tia a sawi avangin, sumdawnna lama a thawhpui lian ber ram China nen an inkar a chhe chho hle thung.