Israel security cabinet-in West Bank thununna tihchakna tur pawm

Israel security cabinet chuan Pathianni khan West Bank an thununna thuam chakna tur dan siam thar a pawm a, hei hi Palestinian thuneitu lam chuan na takin an sawisel zui nghal.

Palestinian president Mahmoud Abbas chuan Israel security cabinet thutlukna chu sawiselin, thil hlauhawm tak, Israel-in ualau taka a ram luah dan anga neih a tumna leh chhuhsak a tumna a ni, a ti. Abbas chuan US leh United Nations Security Council chu inrawlh thuai turin a ngen nghal bawk.

Israel cabinet-in dan thar a pawm huaiah hian Israel mi, West Bank-a khawsate tan ram lei a awlsam tawh dawn a, hei bakah Israel official-te chuan an ram luaha Palestinian mite chunga dan lekkawh turin thuneihna sang zawk pek an ni dawn bawk a ni. West Bank-a sakhaw hmunte enkawlna chu Israel kuta dahna tur pawh a tel nia sawi niin media lam chuan a report bawk a ni. West Bank-ah hian Muslim ni lote tan ram lei phal a ni ngai lo a, hei hi Jordan ramin a thunun laia siam a ni. Pathiannia Israel cabinet-in dan thar a siam hma chuan Juda mi chengte chuan company register-te kaltlang chauhin ram hi an nei ve thei a ni.

West Bank-in Palestinian-ten independent state an din huna Gaza leh East Jerusalem-te nena an ram chin tura an ruahman a ni. Tunah chuan West Bank hmun tam zawk hi Isrel sipai thununna hnuaiah a awm thung a, hmun ṭhenkhat chu khawthlang ram thlawp, Palestinian Authority rorelna hnuaiah a awm thung.