Bangladesh inthlanah BNP chak

Bangladesh ram inthlanpui, Zirtawpni liam taa neihah prime minister hlui, Khaleda Zia party, eptu pawl Bangladesh Nationalist Party (BNP) chu hneh taka thlan tlin a ni. Party chairman, Zia-i fapa Tarique Rahman chu prime minister thar tura rin a ni bawk.

Kum 2024-a zirlai pawl hmalaknaa nawrh huaihawt avanga Sheikh Hasina kaihhruai sorkar paihthlak a nih hnuah, tun ṭum hi inthlan an neihna hmasa ber a ni. Result kimchang hi official-a tihchhuah la ni lo mah se, seat 299 aṭangin BNP leh a thawhpuite chuan seat 212 an la thei dawn nia chhut a ni. Eptu pawl, Jamaat-e-Islami leh a thawhpuite chuan seat 70 an la bawk. Tun ṭum inthlanah hian Hasina party, Awami League chu election comission in an registration a tihtawp avangin an chuh ve thei lo a, kum 30 chhunga an ram inthlanpui an chuh loh vawi khatna a ni. India rama tlanchhe mek, Hasina chuan inthlan hi sawiselin, dan kalh a nih thu a sawi ve thung.

Sheikh Hasina leh a kaihhruai sorkar paihthlak an nihnaa hma la tu, youth activist-ten party an din thar, National Citizen Party (NCP) chuan seat 30 a chuhah seat panga chauh a la thei. NCP hi Jamaat kaihhruai ṭangrual pawlah an tel.

BNP hi kum 2013-a Hasina a prime minister laia an party registration tihtawp sak a nih hnua inthlan an chuh lehna hmasa ber a ni. Hasina paihthlak a nih hnuah party khapna hi sut niin, inthlan hi an chuh ve leh thei ta a ni.

Kumin inthlanpuiah hian candidate 2,000 chuang an awm a, independent candidate an ṭhahnem hle. Party 50 velin inthlan hi an chuh bawk a, constituency pakhatah candidate a thih avangin vote thlak hun sawn a ni. Vote tla hi 60% dawn a tling a,m kum 2024 inthlanah khan vote tla 42% chauh a ni pha.

Inthlan neih ruala mipuiten an ram danpui siamṭhat duh leh duh loh chungchang an thlanah, voter mtd 2 chuangin danpui siamṭhat an duh a, mi 850,000 erawhin an duh lo thung. Ram danpui siamṭhat rawtnaah hian prime minister term chu vawi hnih china bithliah, judiciary inrelbawlna lamah thuneihna sang pek leh, Parliament-ah hmeichhia aiawh tur ruat te, seat 300 awmna tur Parliament second house dinna turte a tel.

BNP chuan inthlana hnehna an chan hnuah an party hruaitu leh member-te chu kawtthlerahte hnehna lawm loin, an rama remna leh muanna, dinhmun ṭha leh hmalam hun eng tak an neih theihna tura ṭawngṭaina hun hmang zawk turin a chah.

Kum 60 mi, Tarique Rahman hi prime minister a nih chuan kum 35 chhunga Bangladesh-a mipa prime minister hmasa ber a ni ang. Kum 2008 inthlana Sheikh Hasina party, Awami League thlan tlin an nih khan a tan a him lo tih sawiin ram pawn lamah a tlanchhia a ni. Hasina kaihhruai sorkar lai khan thubuai hrang hrangah thiam loh a chantir a, mahse an puhnate hi thu dik lo leh politics hmanga an beihna niin a sawi. Kum 20 dawn ram pawn lamah a awm a, prime minister aṭanga Sheikh Hasina paihthlak a nih hnuah nikum December thla khan an ramah hian a kir leh chauh a ni. An rama a kir hnu ni nga lekah a nu, Khaleda Zia hi thi a ni. A nu thih hnuah kumin January 9 khan BNP chairman atan thlan tlin a ni.