UK inthlanah Johnson-a party chak

United Kingdom prime mi­nister Boris Johnson-a kaihhruai Conservative Party chuan December 12-a House of Commons inthlanah hnehna a chang. 

Member 650 awmna Par­liament-a majority nei tura seat neih ngai zat, seat 326 chu Conservative Party hian party  malin a nei pha a ni. Conservative hian seat 364 lain, Labour Party in seat 203 a la thung. Conservative hian inthlan hmasa aiin seat 47 in a la hnem zawk a, Labour Party erawh chuan inthlan hmasa aiin seat 59 in a la tlem thung a ni. 

Tory party hi kum 1980 hnu lama inthlanpuia a chet ṭhat ber ṭum a ni a, hetihlai hian Labour Party hi kum 1935 hnua an chet chhiat ber ṭum a ni ve thung. Boris Johnson hi a bial ngai, Londo-a Uxbridge and South Rui­slip bial aṭangin thlan tlin a ni. 

Johnson hian inthlan dawnin European Union aṭanga Britain inlakchhuah tiamna, 'GetBrexit­Done' chu a auhla ber a ni a, House-ah majority a neih dawn tak avangin Brexit pawh a kaltlangpui thei tawh ngei rin a ni. Boris Johnson chuan an party thlawpa vote tute hnenah lawmthu sawiin, khawvela democracy ram ropui bera cheng an ni tih a sawi. Conservative Party headquarters-a an party mi leh sa pungkhawmte hmaa thu a sawiah, Johnson chuan an ram mipuite chuan thu­tlukna pawimawh tak siam turin thuneihna an pe tih a sawi. Mipuite chuan thil pakhat tihfel thuai turin an duh a, chu chu Brexit a nih tih a sawi a ni. 

European Union hruaitute pawhin UK inthlan hi an ngaihven ve reng a, Conservative Party-in party mala majority a nei thei chu lawmawm an tih thu an sawi.