Naktukah Bangladesh PM thar la lut dawn

Bangladesh prime minister thar leh a cabinet member-te chu naktukah lak luh an ni dawn a, kum 20 dawn hnuah Bangladesh Nationalist Party (BNP) chuan sorkarna an siam leh dawn a ni. Cabinet lak luh a nih hnuah, Parliament member atana thlan tharte lak luh an ni ve nghal ang.

BNP chairman, Bangladesh prime minister thar tur Tarique Rahman chuan nimin khan February 12-a inthlanpui an neiha chuh party hrang hrang hruaitute biain, political party-te chuan ngaihdan hrang hrangte nei mah se, an ram ṭhatna tura inpumkhat a ṭul thu a sawi. An ram tana ṭha taka thawk ho turin a sawm. BNP thawhpuite pawh inthlan zawh hnuah ram chhungah boruak ṭha lo leh, mi dang ngaimawh zawng thil engmah thlen lo turin a chah bawk.

Sorkar thar lak luhnaa telpuin turin South Asia ram hruaitute sawm an ni a, mahse hun a tepter avangin hruaitu tam zawk erawh an tel thei dawn lo a, an aiawh erawh an tirh rin a ni.

Bangladesh Prime Minsiter leh cabinet member lak luh hi President palace-a Durbar Hall-ah neih a ni tlangpui ṭhin. Mahse kuminah chuan he hun hmanpui tura mi sawm an tam avangin Jatiya Sangsad Bhavan-a South Plaza-ah hun hman a ni zawk dawn niin official chuan a tarlang.

President-in PM leh a cabinet member-te hi rinawmnaw thu a tiamtir dawn a, MP-te chu chief election commissioner AMM Nasir Uddin-a'n rinawmna thu a tiamtir ve thung ang.

February 12-a Bangladesh parliament inthlanpui neihah khan BNP hian seat awm zat, seat 297 aṭangin party malin seat 209 an la thei a, an thawhpui party-te nen seat 212 an la pah. Right-wing Jamaat-e-Islami kaihhruai party 11 ṭangrual chuan seat 68 an la ve bawk. Indpendent candidate zingah pariat thlan tlin an ni bawk a ni.