Imran Khan damdawi-inah a rukin dah niin PTI in sawi

Pakistan prime minister hlui, Imran Khan chu a tanna jail aṭangin a rukin damdawi-inah dah a ni tih a party, Pakistan Tehreek-e-Insaf (PTI) chuan an sawi.

PTI chuan kum 73 mi, Khan hi a hriselna a ṭha lo hle a, a mit dinglam khaw hmuh pawh 85% velin a chhe tawh tih an tarlang. Jail aṭanga damdawi-ina dah luh a nih thu hi a chhungte pawh hriattir an ni lo tiin, a dinhmun enfiah laiin a chhungte emaw, a mimal doctor emaw awmtir turin an phut. PTI member-te chuan Khan hi enkawlna ṭha zawk pek phutin kar liam ta Zirtapwni khan Parliament kawtah an pungkhawm bawk. Imran Khan hi jail-ah pawh a chhungte leh a legal team-ten an hmuh phalsak a ni lo fo niin an tarlang.

PTI chuan Khan hi enkawlna ṭha pek a, Al-Shifa Hospital-ah admit turin an phut a, he damdawi-ina dah a nih hma chuan nawrh huaihawt zel an tum tih an sawi. Kar liam ta Ningani khan Supreme Court chuan thuneitute hnenah Khan dinhmun, a bik takin a khaw hmuh a ṭha tawh lo nia sawi chu enfiah tura medical board din turin a lo hriattir tawh a ni.

Prime minister a nihna aṭanga no-confidence vote hmanga paihthlak a nih hnuah, Imran Khan hi thubuai eng emaw zat siamsak niin, thiam loh chantir a ni. Kum 2023 August thla aṭang khan jail-ah dah a ni.