MSF-in Gaza damdawi-ina hna thawh titawp

Medical charity group, Medecins Sans Frontieres chuan Gaza Strip chhim lama damdawi-ina dam lo enkawl leh staff-te aṭangin damdawi-in chhungah silai kengte an awm bakah, ralthuamte chhawp a nih thu an dawn vangin ṭanpui hna an thawh chu an titawp tih an sawi.

MSF thuchhuah chuan Khan Yousin-a Nasser Hospital leh a compound-ah damlo leh thawktute chuan hun eng emaw chen aṭang khan silai keng, hmai tuamte an awm fo thu an sawi tih an tarlang. Gaza-a roreltu, Hamas hnuaia Interior Ministry chuan hospital chhungah silai lak luh an khap a, dan bawhchhiate chu hrem an nih tur thu a sawi.

Israel leh Hamas hian nikum October thla aṭang khan US ruahmanna hnuaiah Gaza Strip-ah inkahhai an puang a; mahse, an inremna siam hi bawhchhiaah an inpuh tawn reng thung. Inkahhai puan a nih hnuah, MSF team-te hian damdawi-in chhunga danin a phal loh ang thil a thlen fo thu te an sawi a ni. Hospital chu civil mite tana hmun him leh zalen a ni tur a ni tiin, dam lote himna ngaihtuah a ṭul thu an sawi.