Chile thlawhtheihna bo: Damchhuak an awm lo
Chile air force thlawhtheihna C-130 Hercules cargo plane chu Thawhṭanni khan a bo hnuah zawn nghal niin, Chilean Air Force head Arturo Merino chuan Ningani khan a chesual tih leh damchhuak an awm loh thu a sawi.
C-130 Hercules thlawhtheihna hi a chhunga chuang 38-te nen Thawhṭanni khan Antartica tuipui chunga a thlawh laiin biak pawh theih lohin a bo a, Argentina, Brazil, UK leh Uruguay-te chuan zawn hna thawk nghalin, US leh Israel pawhin satellite thlalak hmangin an zawnpui ve nghal bawk.
Ningani khan Chile air force chuan an inbiak tawpna ber bulah thlawhtheihna keh them an hmu tih sawiin, mihring ruangte pawh an hmu tih an sawi. Arturo Merino chuan ruang an hmuh dan aṭang chuan tumah an damchhuah a beiseiawm loh thu a sawi a ni.
Thlawhtheihna keh them hi a chhunga chuangte nen an inbiak tawp berna hmun aṭanga km 30 velah hmuh a ni a, Air Force Commander Eduardo Mosqueira chuan thlawhtheihna keh them chu an enfiah dawn thu leh mihring bungrua an chhartelte pawh C-130 a chuangte ta a ni ngei em tih an enfiah dawn thu a sawi. Hemi hnu lawk hia zawn hna thawhnaa ṭanpuitu Brazilian Navy-te chuan bungrua an chhar chu C-130-a chuangte bungrua a nih thu an sawi zui ve bawk.