US-in missile a enchhin
United States (US) Air Force-te chuan Thawhlehni khan Los Angeles hmarthlanga awm Vandenberg Air Force Base aṭangin, medium-range (ground-launched) ballistic missile an enchhin thu Pentagon chuan a tarlang.
Missile an enchhin hi August thla hnua an enchhin leh hmasak berna a ni. An ram huna zing dar 8:30 ah missile hi Pacific tuipuiah enchhin a ni a, a kah thui zawng hi kilometre 500 chuang a ni. US President Donald Trump chuan nikum khan Russia, Soviet Union an nih lai kum 1987-a inremna an lo siam tawh, 'Intermediate-Range Nuclear Forces (INF) Treaty' aṭangin US a inhnukdawk dawn thu sawiin, kumin August 2 khan INF aṭang hian a inhnukdawk fel a ni.
He treaty an ziahah hian Russia leh US chuan ground-launched missile leh cruise missile, mel 200 aṭanga 3,400 chin kap pha siam, thawnchhuah leh enchhin an khap a ni. Ralthuam siamna tura bithliah chin inremna hi Soviet leader Michael Gorbachev leh hetih laia US President Ronald Reagan ten an ziak a ni. Inremna hmang hian ram pahnihte chu an missile neihte inenfiah sak tawn remtih a ni a, kum 1991 khan missile 2,700 dawn chu tihchhiat a lo ni tawh.
Mahse ram pahnihte hian he inremna siam hi ṭum eng emaw zat bawhchhiaah an inpuh tawn a ni. Nikum May thla khan Russia military official chuan US-in INF treaty-in a khap, missile defence system-te chu a enchhin fo a, hei bakah hian missile pawh a siam reng bawk niin a lo puh tawh bawk. Kumin kumtir lamah khan US leh Nato chuan Russia chu INF bawhchhiaah puhin, cruise missile thar siam chhuakah an puh a, mahse hei hi Moscow chuan a pha thung. Hetichung hian US chuan a finfiahna an nei tih sawiin, Russia chuan 9M729 missile (Nato lamin SSC-8 an tih) eng emaw zat chu an siamchhuak niin an puh tho a, hei hi Nato-a a thawhpuite pawhin an pawmpui a ni.
US-in missile a enchhin hi North Korea vauna a nih pah thu khawtlang media-te chuan an tarlang. United Nations-a US ambassador Kelly Craft chuan "North Korea hian missile leh nuclear enchhinna nei fo mah se, an ram security dinhmun a ngheh pha chuang lo a ni," tiin Nkorea chu US-in missile a kahchhuah chungchangah a vau zui.