China-ah halmawi zawrhna dawr kangah mi 8 an thi

China ramah Lunar New Year lawm tura a inbuatsaih laiin, an ram khawchhak lam Jiangsu province-ah Pathianni chawhnu khan halmawi zawrhna dawr puakin a kang zui a, mi pariat an thi.

Lunar New Year hi Spring Festival an ti bawk a, February 17-ah an lawm ṭhin a, a lawmna hi a hma zan zanlai aṭanga hmang ṭanin, halmawi te an hal ṭhin a ni. Mahse, tun hnaiah erawh hmun tam takah halmawi hal hi an khap tawh a ni. Nikum khan tualchhung sorkar ṭhenkhatin khapna an thlahdul leh deuh a ni.

Pathiannia vanduaina thleng vang hian Ministry of Emergency Management chuan region zawng zawngah hriattirna pein, chhiatna dang thleng tur venna atan halmawi siam, zawrh leh hal chungchangah khauh zawka hma la turin a ti a ni. Dawr bul hnaia halmawi leh halpuah khal chu khap tura tiin, mipuite himna tur ngaihtuahna a halna hmun tur, hmun him lai ngaihtuah turin a hriattir.