Geneva-ah US-Iran nuclear talk chhunzawm

US leh Iran chuan nuclear programme chungchanga inremna siamna turin, Thawhṭanni khan Geneva, Switzerland-ah inbiak thawh hnihna an chhunzawm.

Geneva-a nucelar talk neihah hian Iran foreign minister Abbas Araghchi leh US Middle East envoy Steve Witkoff leh US president Donald Trump-a makpa, Jared Kushner te an tel. Inbiakna hi Oman foreign minister Badr bin Hamad al-Busaidi kaihhruaina hnuaiah neih a ni. Iran foreign minister hian inbiakna neih hma hian UN nuclear watchdog, International Atomic Energy Agency director-general Rafael Grossi a hmu bawk.

US leh Iran hian tun thla tir lam khan Iran nuclear programme chungchanga inbiakna neih chhunzawm leh hi an remti a ni. Iran-in nuclear programme a kalpui hi US bakah khawthlang ram dang leh Israel chuan nuclear ralthuam siamna atana hman tur niin an ngai a, mah se Iraq hian a pha thung.

Inbiakna neihah hian US chuan nuclear programme bakah Iran-in missile neih chungchang pawh huam tir a duh a; mahse, Iran chuan missile chu a huam tel lo tih a sawi a ni. Hei vang hian US secretary of state Marco Rubio chuan Hungary a tlawh ṭumin Iran nena inremna siam chu thil harsa tak a nih tur thu a sawi lang. IAEA chuan nikum kum laihawla Israel leh US-in Iran an beih hmaa Iran-in nuclear ralthuam siamna atana pawimawh, urananium sawngbawl tawh kg 440 vel a chhek khawl chu engtinge a tih zawm zel sawi turin a lo nawr fo tawh a ni.

Ram pahnihten inbiakna an chhunzawm hma, kar liam ta khan Israel prime minister Benjamin Netanyahu chuan presidnet Trump hnenah US-in Iran nena inremna an siam dawn a nih chuan, Iran nuclear infrastructure tihchhiatna turte telh tura a duh thu a hrilh tih a sawi. Inremna siam chu ṭha a tih rualin, uranium sawngbawlna pawh tihtawp sak tel a ngai tih a tarlang.