Peru Congress-in interim President ban

Peru Congress chuan Thawhlehni khan an ram interim president, Jose Jeri chu thla li chauh office a luah hnuah a ban leh nghal.

Kum 39 mi, Jeri hi thuneihna a chan hnuah sorkar hna thawk tura hmeichhe eng emaw zat a lak danah thil fel tawk lo a awm nia puh a ni a, hei bakah China mi sumdawng pakhat nen an ram danpui kalha thawk dunah puh a ni bawk. Kar liam ta khan prosecutor-te chuan a chungchang hi an chhui ṭan a, Thawhlehni khan Congress chuan President a nihna aṭangin a ban ta a ni. Hetih lai hian Jeri chuan an puhna hi thu dik lo niin a sawi ve thung.

Interim president term hi kumin July thla thleng tur a ni a, term hmang zo turin interim president thar tur chu Congress hian a thlang leh nghal dawn a ni. Peru hian kum 10 chhungin president pasarih a nei tawh a, a ṭhen chu ban an nih bakah thil dik lo tih vanga thiam loh chantirte pawh an awm bawk.