Cambodia PM-in an ram china awmah Thailand a puh

Cambodia prime minister Hun Manet chuan Thailand nena ramria buaina chungchanga US president Donald Trump hmalaknaa inkahhai puan a nih hnuah, Thailand sipaite chuan Cambodia ram chinah an la awm zui zel niin a sawi. Thailand chu ramria an buaina chinfel dan ngaihtuaha joint boundary commission din remti turin a sawm.

Ram pahnihte hian ramriah inkahhai hi puang mah se an inkar boruak a la ṭha lo hle. Buaina pawh chhuak leh mai thei dinhmunah a ding reng a ni. Cambodia PM chuan Thailand sipaite hi an ram chhung hmun eng emaw zatah awmin, Thailand-in a hma pawha Cambodia rama a lo pawm tawh huam chhungah an inkulh a, hemi chhehvela chengte pawh an in lamah an kir theih loh phah niin a sawi.

Nikum July thlaa ramria buaina an neih kha kum 10 chuang chhunga buaina chhuak lian ber niin, ramri hrula cheng mi sang tel chu hmun him lamah an tlanchhia a, hei bakah ramri kaltlanga an insumdawn tawnna thlengin a tuar bawk. Cambodia leh Thailand hian ramri km 817-a thui an inṭawm a ni.

Thailand chuan Cambodia ram china awma puhna hi a pha a, an sipaite chu an ram chinah an awm reng niin a sawi ve thung.

Cambodia PM hi US president Donald Trump-a din, Board of Peace meeting hmasa bera tel turin US-ah a zin mek a ni. Board hi Gaza-a remna leh muanna a awm a, an inrelbawl leh dinthar lehna tur ngaihtuahtu tura din niin Trump chuan a sawi a, hemi bakah thil dang pawh a la buaipui tel theih tur thu a sawi bawk.