Japan Parliament-in PM atan Takaichi thlang nawn

Japan parliament, Diet member-te chuan Nilaini khan an ram prime minister thar atan rorellai, Liberal Democratic Party (LDP) president, Sanae Takaichi chu an thlang nawn. Japan prime minister 105-na a ni ang.

Lower house, House of Representative-a prime minister thar tur thlanaah Takaichi hian vote 354 a hmu a, eptu pawl Centrist Reform Alliance (CRA) hotu Junya Ogawa chuan vote 50 a hmu ve bawk. Round khatnaah hian majority hmu pha an awm loh avangin upper house, House of Councillors ah thlan leh niin, Takaichi hian vote 125 hmuin, Ogawa hian vote 65 a hmu a ni. Lower house hian LDP veteran, Eisuke Mori chu speaker atan thlangin, CRA member Keiichi Ishii chu vice speaker atan an thlang bawk a ni.

Takaichi hi nikum October thla khan LDP hruaitu atan thlan a nih hnuah prime minister atan lak luh a ni. Kumina inthlanpui neihah LDP leh a thawhpuite chuan seat 465 awmna, parliament lower house-ah hmun thuma ṭhena hmun hnih an la pha a ni. Upper house-ah erawh LDP kaihhruai hian majority a nei pha lo thung.

Sorkar thar lak luh a nih theihna atan Nilaini zing khan Takaichi leh a cabinet-te chuan banna an theh lut a, hemi ni veka Parliament special session neihah prime minister atan thlan a ni leh ta a ni. Takaichi hian a cabinet member turte a ruat dawn a, cabinet-ah hian foreign minister Toshimitsu Motegi, finance minister Satsuki Katayama leh defense minister Shinjiro Koizumi te chu an dinhmun ngaiah a dah leh rin a ni bawk.