SKorea Presidnet hlui Yoon dam chhung tang turin hrem

South Korea president hlui, Yoon Suk Yeol chu kum 2024 December thlaa an rama sipai thuneihna sang pekna, martial law a puan chungchanga thiam loh chantir a nih hnuah, nimin khan dam chhung tang tura hrem a ni.

Seoul Central District Court judge Jee Kui-youn chuan Yoon hremna tur hi a puang a ni. Kumin January thlaa final hearing neihah khan prosecutor-te chuan President hlui hi thi tura hremna pek an phut a, mahse, court chuan a aia nep zawk a pe ta a ni. Nimina court thutlukna puan lai hi South Korea broadcaster liante chuan live-in an pe chhuak bawk.

Jee chuan Yoon chu an ram danpui palzut leh, thuneitute laka helna chawh chhuah tum zawnga cheah a puh. A thiltih avang hian amaha inchhirna tak tak hmuh tur pawh a awm lo a, court-ah pawh a inlan duh lo tih a sawi. Yoon hian nikum khan thu zawh fiah tura court-ah an kohin a inlan duh lo a ni.

Court chuan Yoon hian martial law a puan lai hian sipaite chu mi eng emaw zat man turin thupek a pe tel bawk a, heng zingah hian tuna president ni lai Lee Jae Myung pawh a tel niin a tarlang.National Assembly dang turin sipaite a tir a, an ram parliament chu rorel thei loa dan chah bakah, politician pawimawhte man a tum a ni, a ti.

Martial law puan kaihhnawihah Yoon thurualpui nia puh mi dang panga hremna pawh tihchhuah a ni a, defencen minsiter hlui Kim Yong-hyun chu kum 30 tang turin hrem tel a ni. Yoon leh hremna tawk dangte hian kar khat chhungin hremna pek hi an appeal thei ang.