Pakistan-a gas puakah mi 16 an thi

Pakistan rama Sindh province khawpui, Karachi-a building pakhatah nimin khan gas a puak a, mi 16 an thi a, hliam eng emaw zat an awm. Gas puak hian building pawh a tichhe nual niin police-te chuan an sawi.

Chhiatna thlen hun hi Muslim thla serh, Ramadan ni khatna niin, zing khawvar hmaa ei tur buatsaiha an buai lai a nih thu police hotu Rizwan Patel chuan a sawi. Karachi-a in leh apartment building tam zawkah hian eirawngbawlna atan natural gas supply a ni a;mahse, mi tam tak chuan liquefied petroleum gas cylinder an la hmang tho a ni. July thla khan an ram khawpui, Islamabad-a inneih lawmnaah gas a lo puak tawh bawk a, mi pariat thiin mo leh moneitu chu thi zingah an tel a ni.

President Asif Ali Zardari chuan nimina chhiatna thleng chu pawi a tih thu sawiin, thi chhungte a tawrhpui thu a sawi a, hliam tuarte pawh enkawlna ṭha tak pe turin a hriattir. Sindh province sorkar chu building tin himna ngai pawimawh a, gas cylinder him dante enfiah ṭhin turin a ti bawk.