Brazil-ah tuilian leh leimin vangin mi 25 an thi

Brazil chhim chhak lam, Minas Gerais state-ah ruah sur nasa avanga tuilian leh leimin thlengah mi 25 an thi a, chin hriat lohin mi tam tak an awm bawk. Mi 500 dawn chu hmun him lamah an insawn chhuak bawk a ni.

Thawhṭanni aṭang khan Juiz de Fore leh Uba khuaah ruah nasa takin a sur a, ruahsur hian tuilian a thlen bakah hmun eng emaw zatah lei a min bawk. Thuneitute chuan leitawlh leh leimin hlauhawmna biala chengte chu insawn chhuak turin an ti a ni. Juiz de Fore khuaah hian mi nuai 5.6 chengin, Uba khuaah hian mi nuai 1.07 vel an cheng a, heng khuaah hian February thlaa ruah sur nasat ber ṭum a thleng mek a ni.

Brazil president Luiz Inacio Lula da Silva chuan harsatna tawkte pui tur leh, chhanchhuah hna thawk turin secuirty force ten theihtawp an chhuah thu a sawi. Meteorology institute, Inmet chuan ruah hi a la sur chhunzawm dawn niin a tarlang.