France President-in Louvre museum hotu banna a pawm

France president Emmanuel Macron chuan kum 2025 October thlaa misualin an rawk, thil hlu tak tak an ruk chhuahna, Paris-a Louvre museum hotu Laurence des Cars banna thehluh chu Thawhlehni khan a pawmsak.

Khawvela museum tlawh hlawh ber, Louvre museum rawktu nia rinhlelh mi palite chu man ni tawh mah se, musuem aṭanga an ruk chhuah zawng zawng hlutzawng hi USD mtd 102 hu vel nia chhut a ni. An thil ruk zingah hian Emperor Napolean-a'n a nupui hnena diamond leh emerald ṭhi a pek pawh a tel.

Museum rawk chungchangah Laurence des Cars pawh hian sawiselna a tawk nasa hle a, khawvel huapa hmun lar ni sia venhimna lam a ṭhat tawk loh leh, security atana sum an seng ṭha tawk lote chuan sawisel a hlawh hle a ni . Des Cars hian museum-a CCTV te chu an rei tawhin, rawk a nih lai hian camera-te chuan museum pawn lam chauh a la tih pawh a sawi a ni. Des Cars hi kum 2021 aṭang khan museum director a ni. Rawk a nih ni la la khan banna a thehlut nghal a, mahse, culture minister Rachida Dati chuan a lo hnawlsak a ni.

Louvre museum hi khawvel huap pawha museum tlawh hlawh ber niin, kum khatah tlawhtu mtd 9 vel an awm ṭhin. Museum rawk a nih hnuah, nikum December thla aṭang khan tui leak a awm avang te, ticket pek chhuah danah thil fel tawk lo a awm avangin khar a lo ni fo tawh bawk.