Sri Lanka intelligence hotu hlui man

Sri Lanka investigator-te chuan nimin khan an ram intelligence agency, State Intelligence Service (SIS) hotu hlui, major-general Suresh Sallay chu kum 2019-a Easter Sunday-a Zion Church-a bomb tihpuah kaihhnawihah an man. He bomb puakah hian mi 279 an thi a ni.

Sally hi Easter Sunday-a Kristian biak-in beihnaah hian an inhnamhnawih nia puh a ni a, mah se an puhna hi amah chuan a pha thung. British broadcaster Channel 4 chuan kum 2023 khan Sally hian biak-in bomb tipuaktute hi a hma pawhin a lo hmu niin a report a, biak-in beih an tumna pawh a remtihsak niin an tarlang.

Bomb puah hnu ni hnihah Gotabaya Rajapaksa chuan an ram president thlannaah a chuh tur thu a puang a, November thlaa inthlanah hneh taka thlan tlin niin Sally hi SIS hotuah a dah zui bawk. Mahse, kum 2024 inthlana Anura Kumara Dissanayake a chak hnuah a nihna aṭang hian ban a ni a, Dissanayake chuan biak-in bomb-naa inhnamhnawihte chhui chhuah vek a tiam a ni. Supreme Court chuan pawikhawihna thlen laia an ram president, Maithripala Sirisnea leh senior official palite chu biak-in pawikhawihna thleng tura an dan theih loh avangin thubuai siamsakin, USD mtd 1.03 chuang a lo chawitir tawh bawk.