Russia eptu hruaitu an ramah kir dawn

Russia eptu hruaitu leh President Vladimir Putin langsar taka sawisel ngamtu, Alexei Navalny chuan January 17 hian an ramah kir a tum tih a sawi. 

Kum 44 mi, Navalny hi nikum August thla khan Siberia aṭanga Moscow a pan dawnin a ei turah tur telh a nih avangin Omsk khuaah enkawl a ni a, ṭhat lam a pan theih loh avangin Germany-ah hruai a ni. Berlin damdawi-inah enkawl niin, nikum August thla tawp lam aṭang khan Berlin-ah a la awm zui reng a, amah pawh a ṭha tawh a ni. 

Khawthlang lam mithiamte chuan Navalny hi Soviet-designed nerve agent Novichok hmangin hrai a ni tih an sawi a, Navalny chuan amah beitute Russia security pui ber, Federal Security Service (FSB) niin, President Vladimir Putin thupek anga ti an ni tih a sawi bawk. Mahse he puhna hi Russia sorkar chuan a pha nasa hle thung. 

A dam chhuah leh hnuah Putin leh a kaihhruai sorkar chuan Russia ramah a kir tawh lohna turin theihtawpin hma an la niin Navalny chuan a sawi. Russia prison thuneitute chuan nikum September thla khan Berlin hospital aṭanga chhuah tir a nih hnuah ram pawn lamah a la awm chhunzawm zel a, a parole hun a tawp hnuah pawh thuneitute hmaa a inlan loh avangin dan a bawhchhia niin an sawi. December thla khan investigator-te chuan Navalny-a'n an pawl tana donation an dawn aṭangin dollar maktaduai li chuang a mimal tan a hmang nia puh chungchang a chhui bawk. 

Russia ramah a kir leh a nih chuan jail tang thei mai a ni a, mahse hetichung hian Navalny chuan a hriselna dinhmun pawh a ṭha tawh a, an ramah hian kir leh a tum thu leh, flight ticket pawh a tihfel vek tawh thu a sawi. Hetih lai hian Russia Parliament, Kremlin thupuangtu Dmitri Peskov chuan Navalny a kir lehna turah sorkar official emaw, Russia mipui emaw tumahin harsatna siamsak an tum lo tih a sawi.