Israel-in Syria-ah beihpui thlak

Israel chuan an ram huna Thawhlehni zan khan Syria khawchhak lama ralthuam dahna leh sipai hmunte a bei a, Syria sipai pasarih leh an thawhpui, fighter 16-te an thi niin  Syrian Observatory for Human Rights chuan a sawi. Hei hi kum 2018 hnu lama Israel-in Syria rama beihpui a thlak lehna nasa ber a ni. 

Israel air force-te chuan Syria-Iraq border-a Deir Az Zor khua leh al-Bukamal thlaler inkar hmun tam tak chu ṭum 18 chuang an kap niin Observatory chuan a tarlang bawk. Israel sipaiten beihpui an thlakna hmun hi Lebanese Hezbollah movement leh Iranian-Afghan fighter-te awmna, Fatimid Bridage te chettlatna ṭhin a ni bawk. 

Beihpui thlaknaah hian Syria sipai leh an thurualpui dang mi 28 velin hliam an tuar a, an zinga ṭhenkhat phei chu an dinhmun a ṭha lo hle. January 7 khan Israel chuan Syria chhim lam leh an ram khawpui, Damasus chhim lama hmun ṭhenkhat chu thlawh­theihna hmangin a lo bei tawh bawk a, pro-Iran fighter pathum an that a ni. 

Israel hian Syria ramah beihpui a thlak fo a, a bikin Iran fighter-te awmna hmunte a bitum ṭhin. Israel sipaiten nikum December thlaa annual report an tihchhuahah khan, kum 2020 chhung khan Syria rama Syria sipai, Hezbollah leh Iran fighter-te awmna hmun 50 chu a kap fuh tih a tarlang.