Poland-in Israel spyware hman vangin intelligence hotu thubuai siamsak

Poland prosecutor-te chuan an ram intelligence hotu hlui pahnihte an hna thawhnaah Israel siam, Pegasus spyware an hman avangin criminal case a siamsak a, an thiltih hi an ram information pawimawh tibuai thei a ni, an ti.

National Prosecutors’ Office chuan ABW internal security agency hotu lu, Piotr P leh SKW military counter intelligence service hotu hlui Maciej Marteka chu Nilaini khan thubuai siamsak an ni tih a puang. Prosecutor lam hian an Polish privacy law hnuaiah an hming tawp a thupsak a, mahse, thubuai siamsak zawkte hian prosecutor-te thiltih demna thu hi social media lamah an post lang a ni.

Intelligence hotu hlui pahnihte hian Israel spyware siam hman hian agency hnathawh leh an thurukte dinhmun hlauhawmah a dah thei tih hre reng chung leh, hman phalna an nei lo chungin software hi an hmang niin prosecutor office chuan a sawi. Thiam loh chantir an nih chuan kum thum lung-in tantir theih an ni ang. Anni pahnih bakah official ṭhenkhat pawh Pegasus system hman vangin thubuai siamsak an ni bawk.

Hetih lai hian Materka chuan SKW hotu a nih laia an hnathawh dan hrang hrang leh thutlukna an siamte chu danin an phal ang leh, court-in a pawmpuina veka tih a ni tih a sawi thung.

Pegasus spyware hi Israel cyber-arms company, NSO Group siam niin, ram dang sorkara agency-ten an hman phalsak a ni. Hacking leh surveillance tool ṭangkai tak a ni tel a, a target mobile phone ami personal leh location data te a lak sak thei a, hei bakah phone microphone leh camera pawh a hmangtu hriat si lohin a thunun sak thei bawk. User information a ensak theih zingah hian thlalak, web search, password, call log leh social media post te pawh an tel.