Europe-ah firfiaka chetna a thleng. r Turkey-a Russian ambassador kahhlum a ni r Berlin-ah truck hmangin mi 12 chil hlum

Ankara, Turkey-a Russiam ambassador kahhlum a nih aṭanga darkar khat hnuah, Berlin-a Krismas bazarpui lai tak, Kaiser Wilhelm Memorial Church bulah mi pakhatin truck lian hmangin kawtthlera mipui bazar lai a chil a, dawr te pawh a su chhe tel. He pawikhawihnaah hian mi 12 an thi a, mi 48 ten hliam an tuar.

July thlaa Nice khuaa mipui pawngchil an nih hnu a, motor hmanga pawng chil thlen lehna hmasa ber a ni. Berlin khawpuiah hian Pakistan aṭanga Germany-a inhumhim tuma tlan lut pakhat chuan mi truck ru chhuakin, mipui leh kawng kama dawrte suin a chil a, pawikhawihtu hi man nghal a ni.

Pawikhawihtu hi kum 23 mi Naveb B a ni a, hming lem hmanga Balkan bial aṭanga nikum December 31-a Germany-a lut a ni. Naveb B hian Thawhṭanni zan dar 7 velkhan, darkar khata mel 40 zeta chakin bazar lunlaiah hian a tlan lut a ni. Naved B hi a hma pawhin pawikhawihna tenauah a lo inhnamhnawih fo tawh niin Berlin Police-te chuan an sawi. Mi chilhlum nana a hman truck hi Poland-a mi a ni a, a driver tak chu motor hnungah hian thia hmuh a ni. Pawikhawihna a thlen hnu hian Berlin police-te chuan mipui chu an him zawk nan in chhunga tawmim turin an hrilh.

Ram hrang hrangin he pawikhawihna hi an dem thu an sawi a, White House chuan German chancellor Angela Merkel hnenah tawrhpuina leh demna thu an thawn nghal. US president-elect Donald Trump chuan ISIS-te thil tihah ngaiin, ISIS te chu Kristiante bei hrim hrimah a puh. France president Francois Hollande chuan French mipuiten German mite tawrhna chu an ṭawmpui thu a thawn a, he pawikhawihna hian Europe mipuite nasa takin a nghawng a ni a ti.

He thil thleng avang hian German mi tam tak chuan Angela Merkel an dem hle. Angela Merkel-in Germany-a raltlante luh a phalsak avangin a hma pawhin sawiselna a nasa tawh hle. Nikum chhung ringawt khan raltlan 890,000 zet chu Germany-ah hian lakluh an ni.

Thawhṭanni khan Turkey khawpui Anakara leh Germany khawpui Berlin-ah te firfiaka chetna nena inkaihhnawih nia ngaih theih a thleng. Turkey-ah hian Russian ambassador kahhlum a ni a, Germany-ah mi pakhatin truck-in Berlin Krismas bazar-ah mipui a chil a, mi 12 lai an thi.

Thawhṭanni khan Turkey khawpui Ankara-a art exhibition neihnaah mi pakhat chuan Turkey-a Russia palai, Andrei Karlov, kum 62 mi chu a hnung lam aṭangin a kap a, a hliam tuar loin Andrei Karlov hi a thi. Anakara-ah hian Russia, Turkey leh Syria foreign minister-teín Syria ram buaina chung≠chang an sawiho dawn a, hemi hma lawk hian tualthahna hi a thleng a ni. A hma niin Turkey-ah hian Syria rama Russia chet dan leh mihring dikna leh chanvo a nekchep duh lohna lantir a ni.

Tualthahna thlenna hmun hi Ankara-a Cankaya District chhunga Cagdas Sanatlar Merkezi-ah a ni a, he hmun hi art lam entirna hmun a ni. Russian ambassador Andrei Karlov hian thu a sawi laiin, a hnung lama pa sang tak, suit ha chuan a silai chu van lam hawiin a hmet puak a, Andrei Karlov hi a kap ta a ni. Tualthattu hian ìAleppo-ah min that a, keinin hetahî tiin a au a, ëAllahu Akbarî (Pathian a ropui ber) tiin a au zui leh bawk. He thil thlengah hian mi pathumin hliam an tuar. Turkey police-te chuan a hnu minute 15-ah tualthattu hi an kaphlum a, police-te sawi dan chuan amah hi kum 22 mi, Mevl¸t Mert Altintas a ni a, Turkish riot police mi leh sa a ni. Hei hian July thlaa Turkey sorkar lai paihthlak tumna nen khan inzawmna a nei nia hriat a ni. Hei bakah hian silai a hmeh puah laia a thu sawi hi Syria-a firfiak pawl, Al Nusra-te au hla nia sawi a ni bawk.

Russia president Vladimir Putin chuan he tualthahna hi demin, ìHe pawikhawihna hi rinhlelh rual lohin Russia leh Turkey inkar ṭha chho zel tihchhiat tumna leh, Syria-a muanna a awm theih nana hmalakna tihṭhuanawp tumna a ni,î a ti. Nimin khan Turkey, Iran leh Russian foreign minister-te chuan Aleppo aṭanga civil mite thiarchhuah dan chungchang an ngaihtuah.