Khawvel Lawrkhawm

Mosul, Iraq atangin mi nuai khat chuang an tlanchhe tawh

Iraq sipaiten Islamic State (IS) firfiak pawl kut aṭanga Mosul khawpui lak let tuma beihpui an thlak hnuah, Mosul khuaa cheng mi nuai khat chuang an tlanchhe tawh niin, International Organisation for Migration chuan a tarlang.

October 17 aṭang khan Iraq sipaite chuan Mosul lak let tum hian beihpui an thlak ṭan a, US kaihhruai ṭangrual sipaiten thlawhtheihna hmangin an lo pui bawk. Beihpui thlak a nih hnu hian mi 103,872 an tlachhe tawh a, an zinga a tam ber hi Nineveh province-a chengte an ni. Chhawmdawl hna thawktute chuan mi tam zawk an la tlanchhiat belh an rin thu an sawi.

Iraq army-a Counter-Terrosim Service-te chuan Mosul khawchhak lam hi an lut tawh a, khawchhak bial zahve dawn chu firfiakte kut aṭangin an lalet tawh a ni. Chhim lam aṭanga beitute erawh chuan hma an la sawn chak lo hle a, hmarlam beitu sipaite pawhin khawpui chhung hi an la lut lo.

IS firfiak hian kum 2014 khan Mosul khawpui bakah, Baghdad hmarlam bial zau tak chu sipaite kut aṭangin an lak sak a, mahse an ram lak zinga a tam zawk chu sipaite hian an lakir leh tawh a ni.

Juda miten Amona chhuahsan an remti

West Bank-a Amona hmuna cheng, Juda mite chuan an awmna hmun chhuahsan an remti.

Israel Supreme Court chuan Israel-in Palestian ram a luah, West Bank-a Amona outpost-a Juda-te chenna in chu private rama sak a ni tiin, dan kalh a ni tih a lo sawi tawh. Amona hmuna chengte chu December 25 hmaa an khua chhuahsan turin hriatir an ni.

Pathianni khan Amona khaw aiawhte chuan sorkar≠in hmun danga insawn tura rawtna a siam chu an remti thei ta niin Prime Minister Benjamin Netanyahu chuan cabinet meeting-ah a sawi. PM chuan Amona khuaa chengte buaina chinfelna tur chu sorkarin theih≠tawp chhuaha a ngaihtuah thua sawi. December 25 thleng insawn chhuak tur hian hun pek an ni a, hemi hnua la awm luite chu tihluihna hmanga chhuah tir an ni ang.

Iran-in thlawhtheihna 100 leina tur tifel

Iran chuan Airbus hnen aṭanga thlawhtheihna 100 leina tur a tifel a, nakkum January thla laihawlah pek ṭan theih beisei a ni.

Inremna an siamah chuan Airbus hian thlawhtheihna chi li - medium-haul A320 leh A321 aircraft bakah, long-haul A330 leh A350 te a pe dawn a ni. Iran hian kar hmasa khan Boeing hnen aṭanga thlawhtheihna 80 leina tur a lo tifel tawh bawk.