Strait of Hormuz-ah tanker escort turin US Navy inpeih

US leh Israel-in Iran an beih hnuah, Iran chuan khawvel huapa oil phurtu lawng lianten an paltlang hmun pawimawh, Strait of Hormuz a khar a, lawng lian kal tlang luih tumte chu beihah a vau bawk. Hemi hnu, Thawhlehni khan US president Donald Trump chuan Strait of Hormuz kaltlang tur oil tanker-te escort turin US Navy a inpeih thu a sawi thung.

Strait of Hormuz hi Iran leh Oman inkara awm niin, khawvel huapa sumdawnna kawnga point pawimawh tak a ni. Persian Gulf leh Gulf of Oman thlunzawmin, Arabian Sea thlengin a pawh a ni. Iran leh Oman inkara awm ni mah se, international shipping lane-ah ngaih a ni. Saudi Arabia, Iran, Iraq, Kuwait leh United Arab Emirate ten an oil thawn chhuahna atana an kalka pawimawh a ni.

Strait of Hormuz khar a nih thu a puan hnuah khawvel huapin oil man pawh a sang nghal a, hetih lai hian he hmun hi khar pumhlum a ni em tih erawh sawichian a awm lo thung. Mahse, a pawimawh em avangin hun rei vak lo khar emaw, oil tanker-te lo tihkhawtlai ringawt pawhin khawvel huapin nghawng a nei nghal a ni. Thawhṭanni khan tanker pathum, oil barrel mtd 2.8 phur chauhin Hormuz hi an paltlang. Dan pangngaiah chuan ni khata Hormuz kaltlanga oil phur chhuah hi barrel mtd 19.8 a tling ṭhin. March 2 khan tanker pakhat leh bungraw phur lawng pakhat chauh an kaltlang.

Indona a thlen hnuah Strait of Hormuz-ah hian Iran ta ni lo tanker 706 vel an tangkhang mek a, heng zingah hian crude oil phur 334 bakah dirty product tanker 109 leh clean product tanker 263 an tel. Gulf of Oman-ah tanker za tel an tangkhang nia sawi a ni bawk.