China-in GDP target 4.5-5% ah tihniam

China parliament, National People's Congress (NCP) session chu nimin aṭang khan neih a nia, premier LI Qiang-a'n work report a pekah, kumin atana gross domestic product (GDP) ṭhanna tura target chu 4.5-5% ah ruahmanin, hei hi kum 1991 hnua a hniam ber ṭum a ni.

China hi US nena chhiah lak chungchangah buaina an la nei chho reng a ni. GDP ṭhanna atan ram pawn lamah a bungrua thawnchhuahah a innghat lian hle a, US nena an insumdawn tawnna kawngah harsatna a awm chhoh chuan GDP target thlengin a nghawng a ni. Kum thum kal ta chhung khan GDP target hi 5% ah dah a ni ziah a, kuminah erawh a vawi khatna atan 4.5-5% ah tihhniam a ni ta thung.

Nimina NCP session ṭan niah hian president Xi Jinping leh deputy 2,000 chuang an tel. Premier Li chuan report a pekah kumina hmasawnna tura ruahmanna an siam zingah khawpuia hna thar mtd 12 chuang siam a,urban unemployment rate chu 5.5% ah awm chhunzawm tir zela tum a, consumer price index chu 2% velah tihpun tum a ni bawk.

PM in work report a pekah hian sipai thuam chakna tura sum ruahman chu 7% ah tihsan niin, USD mtd 275 ruahman a ni. A zawna kum 11 chhung defence budget tihpunna single digit a nihna a ni. Hetih lai hian US Department of Defence chuan kum 2024-a China-in defence budget atan USD tld 231 a puan laiin, a taka a hman erawh USD tld 304-377 a tling pha daih niin a sawi thung.