UK-in ram 4 tan student visa a titawp dawn

United Kingdom chuan ram pali - Afghanistan, Cameron, Myanmar leh Sudan ram aṭanga zirlai kalte hnenah student visa a pe chhunzawm tawh dawn lo tih a puang. Hei bakah Afghansitan mite tan work visa a titawp dawn bawk. Hei hi an rama pem lut tam zel leh, an ram mipuiah pem lutte ngaimawhna a len chhoh zel vang nia ngaih a ni.

UK Home Office chuan hemi chungchanga thuchhuah a siamah, ram pali an tarlan tak aṭang hian zirlai, inhumhimna dila an rama lut hi 2021 leh 2025 inkarah khan 470% in an pung niin a sawi. Secretary of State for the Home Department Shabana Mahmood chuan indona leh tihduhdahna tuar avanga tlanchhiate chu Britain chuan a theih angin a lo hum zel dawn tho a, mahse, visa system erawh dik taka kalpui a ni ang, a ti. Khawngaihna an lo lantir avanga an visa system palzut ṭhinte danna turin he thutlukna hi siam a nih thu a tarlang bawk.

UK mipuite hian an rama pem luh chungchang an buaipui tawh hle a, mipui ngaihdan lakah pawh ram dang aṭanga pem lut pung zel chu duh lo leh ngaimawh an tam tawh a ni. Mipui rilru thawi damna turin leh an ram venna tur kawng khat atan, prime minister Keir Starmer kaihhruai sorkar chuan dan loa pem lutte rang zawka thawnkirna tur leh, an rama inhumhimna dil dan tur pawh khauh zawkin a kalpui a ni. Kum 2025 khan zirlai, inhumhimna dil an phalsak chu 25% in a lo titlem tawh a ni.