NKorea hotuin naval destroyer a endik

North Korea ram hotu, Kim Jong-un chuan an ram navy indo lawng lian, ton 5,000 a rit, Choe Hyon naval destroyer tlawhin a endik a, lawng aṭanga missile enchhinna neih chu a enpui nghal bawk.

Korean Central News Agency (KCNA) chuan Kim hian Thawhlehni leh Nilaini khan an ram khawthlang lama lawng siamna hmunpui, Nampo Shipyard tlawhin a endik a ni. Choe Hyon hi an ram chhunga siam, “Choe Hyon-class” destroyer series thar ber leh a siam chhuah pathumna a ni. Kum 2025 May thla khan Choe Hyon-class destroyer pahnihna an siam chu Chongjin Shipyard-a tlangzarhna an neih laiin a let a, he hunah hian Kim pawh hi a tel a ni. Kim hi a lungawi lo a, inthlahdah leh mawhphurhna hlen loh vang niin a sawi a ni. Nikum June thla khan siamṭhain tlangzarh leh nghal a ni a, mahse, ram dang expert-te chuan a hman tlak ngei em tih zawhna an siam a ni.

Kim chuan Choe Hyon siam chu an ram sipai thuam chakna tura a thil tum tihpuitlinna pakhat a nih thu a sawi. Workers Party Congress-a kum nga chhung atana an ram sipai thuam chakna tur ruhamnaa a siam a tarlanah, navy lam hi a dah pawimawh tel hle a ni. Hetih lai hian South Korea lam chuan lawng hi Russia puihnaa siam niin a sawi a, hman nghal theih a ni em tih erawh hriatchian a ni lo.