Trump impeachment: Judiciary Committee-in impeachment charge a pawm
US House Judiciary Committee chuan president Donald Trump impeachment charge pahnih a pawm a, tunkar chhung hian Democrat thuneihna House of Representatives-ah vote lak rin a ni.
Zirtawpni liam ta khan Trump impeachment charge pahnih hi minute 10 vel hearing neih a ni a, Ningani khan darkar 14 vel zet debate neih a ni tawh bawk. Zirtawpnia hearing neih zawh hnu khan vote lak nghal niin, kaltlangpui duh lamah hian vote 23 a tlak laiin a duh lo lamah vote 17 a tla thung.
Donald Trump hi thuneihna hmang sual leh Congress dipdalah puh a ni. Ningani khan impeachment charge kaltlangpui tur chungchangah hian US House Judiciary Committee hian vote a lak rin a ni tawh a, mahse debate an neih rei avang hian an la hman lo.
Republican lam chuan impeachment charge hi kaltlangpui an duh lo hle a, nasa takin an hnial a ni. Thuneihna hmang suala puh a nihna hnuaiah hian ram dang aṭanga politics lama ṭanpuina dawngah puh a ni a, a khingpui Joe Biden eiruk thubuaia chhui a nih theihna turin Ukraine nawr luiah an puh a ni. House chhuichianna thawhpui duh loah puh ni bawkin, hemi hmang hian Congress chu a dal niin an puh bawk.
Republican Congressman Matt Gaetz chuan impeachment chu Democrat ho ruihhlo a nih thu sawiin, Democrats lam chuan Trump hi ram phatsantuah leh eiruah an puh thung. Donald Trump hi US President zinga impeachment hmachhawn palina a ni.