Turkey-in Syria raltlante tan funding pe tam turin EU ngen

Turkey rama khawsa mek, Syria raltlante tan Turkey chuan European Union (EU) hnenah sum tam zawk pe turin a ngen. 

"Kan ramah hian raltlante an lo luh zel avangin, raltlante hi kan ngaihthah ringawt tur a ni lo a, kan zavai hian a chhawmdawl hna chu kan thawk ho tur a ni," tiin Turkey deputy minister of foreign affairs leh director for EU affairs, Faruk Kaymakci chuan ṭanpuina an mamawh belh thu a sawi. 

Raltlante chhawmdawl hna thawhna kawngah hian US dollar tluklehdingawn 40 chuang mamawh a ni a, mahse US dollar tld 2.6 vel chauh EU aṭang hian ṭanpuina pawisa Turkey hian a dawng a ni. Heng an mamawhte hi phuhruksak an nih theih nan, Turkey chuan EU hnenah hian ṭanpuina an mamawh belh thu a thawn a ni. Syria raltlante hi Europe-ah hian an pem lut fo a, Turkey leh EU chuan kum 2016 March thla khan inremna siamin, heng pem tumte ṭanpuina atan EU chuan euro tld 6 pek a tiam. 

Turkey ram kaltlanga danloa Greece rama pem tumte hi mi 58,707 an nih thu Turkish coast guard-te chuan an tarlang. Turkey aṭang hian Europe-ah leh ram hrang hrangah, ralmuanna, hna leh eizawnna ngialnghet zawk an hmuh theih nan Syria raltlante hi pem an tum fo a ni. Kum 2011 aṭang khan sorkar leh sorkar paihthlak duha helte inkarah indona a chhuak a, Syria-ah hian tualchhung indona a chhuah reng avangin mipuite chu ram hrang hrangah an raltlan nasa hle. 

Tualchhung buaina hian ziaawm lam a pan tawh avangin, 2017 kum laihawl aṭang khan raltlante hi an ramah an kir leh ṭan tawh a, raltlan 2,60,000 vel chu an ramah hian an kir leh tawh nia rin a ni bawk. October thla khan Lebanon-a Syria raltlan 1,000 vel chu an ramah an let leh niin, Lebanon National News Agency chuan a tarlang.