Lebanon-ah police leh nawrh huaihawtte in-beihna thleng leh

Lebanon khawpui Beirut-a sorkar laka lungawi lo nawrh huaihawtte leh security force-te inbeihna thlengin mi tam tak in hliam an tuar. Nawrh huaihawtte hi Beirut-a parliament bulah lungawi lohna lantir an tum a, parliament an hnaih theih lohnan  security force-te chuan rubber bullet, tui leh mittui tlakna hloten hnawhdarh tumin an lo bei a ni. Sorkar laka lungawilote hian lungin an lo tawng let ve bawk.

He inbeihnaah hian 'The Red Cross' leh 'Lebanese Civil Defence'-te chuan mi 46-in hliam an tawrh thu leh, heng hliam tuarte hi a rang thei ang bera damdawi-in lama dah an nih bakah, hliam nei vak lote chu a hnua chhuah leh nghal tur an nih thu an tarlang.

Nawrh huaihawt hi October 17 aṭang khan neih ṭan a ni. Lebanon sorkar chuan WhatsApp call-ah chhiah lak a nih tur thu a puang a, hemi duh lohna avang hian mipuite chuan sorkar laka lungawi lohna hi hemi ni vek hian an lantir zui nghal a ni. Nawrh huaihawtte hian an ram politics kalphung chu nasa takin an sawisel a, an rama hmasawnna ruhrel chhe lutuk vang te, eirukna hluar vang te, sorkar funding hman khaw loh avang leh unemployment rate sang vangte leh an ram economy tlachhe lutuk vangin, sorkar lakah hian lungawi lohna hi an lantir a ni.

Lebanon ram chhung buaina avang hian cabinet minister palite chu October thla tawp khan an lo bang tawh a, anni bakah an ram prime minister Saad Hariri chu  October 29 khan PM  anihna aṭangin a lo bang tawh bawk. 

Lebanon president Michel Anoun chuan an ram dinhmun siamṭhat tuma hma lain, nawrh huaihawtte nen inbiakna neih pui a duh thu a lo sawi tawh. Mahse President rawtna siam hi mipuite mamawh tihpuitlinna tur a ni lo tiin, Beirut khawpuia lungawi lohna lantir a, puanina inkulh civil society group hrang hrang chuan President sawmna hi an hnawl sak.