Iran ambassador-in UK a vau

UK-a Iran ambassador, Seyed Ali Mousavi chuan US-Israel leh Iran indona thleng mekah inrawlh thuk lutuk lo tura fimkhur hle turin UK a vau.

Mousavi chuan Iran beih meknaah UK chu direct-a a inrawlh ve a nih chuan, Iran chuan a ram venghim tura bei let turin dikna a nei a ni, tiin BBC in a kawmnaah a sawi. Britain sorkar chuan hma a lak dan tura fimkhur taka thutlukna a siam an beisei tih a sawi.

UK sorkar hian US-in Iran a beihna atan a military base hman a lo phalsak tawh a, mahse, indonaah erawh direct-in an tel ve lo thung. Iran ambassador chuan UK chu a inrawlh loh chhunzawm zel a beisei thu sawiin, kum 2003-a Iraq beihna thlengah khan zirlai ṭha tak a zir chhuah ngei a ring tih a sawi bawk. Iran-in a ṭhenawm ramte a beih tel chungchangah pawh, heng ram hrang hranga US military base bei turin dikna an nei a ni, a ti. America leh Israel sorkar chet dan azirin an la che chhunzawm zel dawn niin a sawi bawk.