G7-in Gulf tuipuiah lawng venhimna pek dan ngaihtuah remti

Group of Seven, G7 ram - US, Canada, Japan, Italy, Britain, Germany leh France hruaitute chuan Nilainia video conference an neihah, US-Israel leh Iran indona thleng mek avanga oil phurchhuah kawnga harsatna thleng sawi hoin, Gulf tuipuia oil phurtu lawngte an him theihna atan vengtu, escort pek dan ngaihtuah an remti.

G7 president dinhmun chelh mektu, France president Emmanuel Macron kaihhruaiin video conference hi neih a ni a, Iran war thleng mek leh hemiin a nghawng, khawvel puala oil thawn chhuah kawnga harsatna awm leh oil man sang chungchang an sawi ho a ni.

Thuchhuah an siamah lawng liante vengtu tur, escort ship dah dan tur chungchang ngaihtuah ho an remti a, hei hi shipping company, transport company leh insurer te pawh hriattir an ni dawn tih an tarlang.

Khawvel huapa energy supply lamah Middle East ramte an pawimawh avangin, a phur chhuah kawngah pawh zalen leh him taka an kal theih dan chu ngaih pawimawh a ṭul thu an sawi. Gulf ramte nena thawh hona chak zawk neih a nih theihna turin G7 leh Gulf Coopertion Council (GCC) te inbiakna nei turin Italy prime minister Giorgia Meloni chuan rawtna a siam bawk. Iran-in a beih mek Gulf ramte thlawp ṭhat a pawimawh thu a sawi bawk.