Iran-in a beih vangin Iraq-in oil port pahnih a khar

Iran chuan US leh Israel-in an ram a beihna a chhan letnaah, a ṭhenawm Gulf ramte a la beih chhunzawm zel. Nilaini khan suicide boat hmangin Iraq tuipui huam chhungah US oil tanker leh tanker dang pakhat a bei a, hei vang hian Iraq chuan a oil port pahnih a khar zui nghal a ni.

Iraq tuipui, Khor Al Zubair port bulah US oil tanker leh Marshal Island flag zarna oil tanker, Safesea Vishnu chu Iran hian bomb phurtu lawng hmangin a bei a, tanker-te hi puakin an kang zui nasa hle.

Kuwait pawhin an ram beihna atana Iran drone kah an lo kahthlak sakin power tranmission line paruk a tlak avangin an chhia tih a sawi bawk. Iraq-a Kurdistan bial, Erbil-a Italy military base pawh Nilaini zan khan drone hmanga beih a ni bawk a, thi leh hliam erawh an awm lo niin Italy defence ministry chuan a tarlang. Erbil-ah hian Kurdish security force-te training pein Italy sipai 300 vel an awm a ni.

Hetih lai hian Iran president Masoud Pezeshkian chuan social media-a indona tihtawpna tura an thil duh pathumte a tarlang. Pezeshkian chuan Pakistan leh Russia hruaitute a biak thu leh, Iran chaun remna leh muanna a awm a duh thu a sawi. Israel leh US-in an ṭan, indona tihtawpna tur chuan thil pathum - Iran dikna chanvo neihte pawmsak, an rama an thil tihchhiat man pek leh, hetianga anga beihna a thlen tawh loh khawvelin a tiamte a nih thu a sawi.