Amsterdam-a Juda sikul beih a ni

Netherlands khawpui, Amsterdam-a Juda sikul-ah kar liam ta khan bomb tihpuah a ni a, mahse thil tihchhiat lian tham lutuk a nei lo a, thi leh hliam an awm lo bawk.

Amsterdam mayor Femke Halsema chuan he thil thleng hi a ngai thutak hle tih sawiin, Juda hnam beih tumna nia an ngaih thu leh, khawpui chhunga Juda institution hrang hrangahte venhimna tihchak a nih nghal tur thu a sawi. Prime minister Rob Jetten chuan pawikhawihna thleng hi a dem takzet tih a sawi bawk a, Juda hnamah hlauhthawna leh thinurna a siam a ni, a ti. Juda mite himna chu an ngai pawimawh hle dawn tih X-ah a tarlang.

Zirtawpni liam ta khan Rotterdam-a Synagogue chu beih a lo ni tawh bawk a, hei vang hian khawpuia synagogue leh Juda institution hrang hrangah venhimna tihkhauh a ni bawk a ni.