Cuba-a nawrh huaihawtten Communist party office suasam

Cuba rama thil man sang zel leh power supply lama harsatna awm avangin kar liam ta khan nawrh huaihawt a ni a, pungkhawmte hian Moron khawpuia rorellai party, Communist party office luhchilhin an suasam. Office hi an hal zui bawk tih Cuba Interior Ministry (Minint) chuan a sawi.

US in oil an leina tur a dan sak avanga oil lam indaih tawk lohna thleng leh, ei tur leh damdawi man sang chak zel avangin Cuba mipuite hi an lungawi lo a, sorkar pawh harsatna chinfel dan ngaihtuah turin an lo nawr fo tawh a ni. President Miguel Diaz-Canel chuan lungawi lohna an lantir leh an thil phutte chu dan kalh a ni lo tih a sawi a, mahse, tharum thawh leh mipui tiralṭi zawnga an che chu enliam mai an ni dawn lo tih a sawi.

Mipuite'n nawrh an huaihawt hnu hian sorkar chuan an harsatna tawh mek chinfel dan ngaihtuaha US nen inbiakna an neih mek thu a tarlang. US-in Cuba rama oil thawn luh a khap hnuah thla thum chhung chu oil an chaw lut thei tawh lo nia tarlan a ni.

US sipaiten January thlaa Venezuela president Nicolas Maduro an man hnuah, US president Donald Trump chuan Venezuela thurualpui, Cuba chu an bitum leh tur a nih thu a lo sawi tawh a ni. Hemi hnu hian US chuan Venezuela chu Cuba rama oil a thawn luh a khapsak a, hei bakak Cuba hnena oil hralhtu ram dangte pawh an laka chhiah lak tihsanah a vau zui bawk. Cuba hian oil a mamawh zat aṭanga a zahve vel hi Venezuela aṭanga a lak luh a ni. US in a dansak tak avangin an ram economy thlengin a tuar tawh a ni. An ram khawpui, Havana ah pawh ni khatah power supply hi darkar 15 chhungte tihtawp a ni ṭhin. Energy lama harsatna an tawh avang hian kar liam ta khan zirlaite chuan University of Havana-ah lungawi lohna an lo lantir tawh bawk a, an zirna thlengin a nghawng buai tawh hle tih an tarlang.