Khawvel Lawrkhawm

Mexico-ah halmawi zawrhnaa thil puak avangin mi 29 an thi

Mexico City-ah halmawi zawrhna bazara thil puak avangin mi 29 an thi a, mi eng emaw zatin hliam an tuar.

He thil thlenna hmun hi San Pablito fireworks bazar, khawpui aṭanga km 32 vela hla niin, halmawi te chu puakin kangmei nasa tak a chhuak zui a ni. Police leh damdawi lam thiamte tirh nghal an ni a, thil puahna chhan hi hriat a la ni lo.

Official-te chuan hliam tuar zingah hian naupang eng emaw zat an tel tih sawiin, ṭhenkhat chu an taksa 90% kang pawh an awm a ni, a ti.

Mexico President Enrique Pena Nieto chuan, vanduaina thlenga thi chhung≠te a tawrhpui thu leh, hliam tuarte pawh an dam thuai a duhsak thu a sawi.

Kum 2005 September thla khan San Pablito bazar-ah hian hetiang thil hi a lo thleng tawh a, halmawi an zawrhte chu nasa taka kangin mi tam takin hliam an tuar a ni.

Boeing thlawhtheihna tlaah mi panga thi

Colombia airlines Aerosucre Boeing thlawhtheihna chu Thawhlehni khan a tla a, mi panga an thi.

Thlawhtheihna hi an ram sanaa tlai dar 5.15-ah Venezuela ramri bul, German Olano airport aṭangin a thlawk chhuak a, airport aṭanga mel 10 vela hla, Puerto Careno-ah a tla a ni. Thlawhtheihna-ah hian mi paruk an chuang a, pilot, co-pilto leh crew member-te an ni.

Australia-ah magnitude 6.5-a nain lir a nghing

Australia hmarlam leh Indonesia hmun ṭhenkhatah nimin zing khan magnitude 6.5-a nain lir a nghing a, mahse lirnghing hian thil tihchhiat lian tham a neih hriat a ni lo.

US Geologicial Survey chuan lir≠nghing inṭanna hi East Timor-a Dili hmarchhak lam km 278 vela hla, lei hnuai km 158 vela thuk niin a sawi. He lirnghing hi Daring leh a chhehvel bial ten an hria a ni.