UN-in Duterte-a tualthah thubuai siamsak phut

United Nations chuan Phi≠lippines thuneitute hnenah, an ram President Rodrigo Duterte-aín Davoa City mayor a nih lai a, ama kut ngeia pawikhawihtute a tihlum ṭhin thu a sawi chung≠chang chu chhuichiang tur leh, tualthah thubuai siamsak tura a phut thu a sawi.

Duterte hian Philippines president a nih hnuah an rama ruihhlo tihrem tumin ruihhlo lakah indo a puang a, ruihhlo zuar leh ti nia rinhlelhte laka beihpui thlaknaah mi 6,000 chuang thah an ni tawh.

UN High Commissoner for Human Rights Zeid Raíad al-Hussein chuan, tunhnaia Duterte-aín mi a that tih a sawi chungchang chu chhui chian an phut thu Thawhlehni khan Geneva-ah a sawi. Duterte hian kum 1988 khan mi rubotu nia rinhlelh mi pathum chu police-te nen an inkahnaah officer-te puihnain a that niin a sawi bawk.

Zeid chuan, ìPhilipppines-a dam lama thuneitute chuan dan an kengkawh ngei tur a ni, an thuneihna hmangin tualthah chungchang hi an chhui chiang tur a niî a ti. Miin tual a thah thu ualau taka a puanzar laia dam lama thuneitute lamin engmah an ti lo chu thil awm lo tak a nih tih a sawi bawk.

Hetihlai hian Duterte-a thlawptute chuan president a nih avangin thubuai siamsak theih a ni lo a, president a nih hmaa a thil tih nia a sawi chungchang pawh chhui zui theih a ni lo bawk tih an sawi. Duterte chu a thuneihna aṭanga paih≠thlak a nih hunah chauh chhui theih a ni ang, an ti. Congressman Roldofo Farinas chuan, he thil thleng chungchang hi hetih hunlaia justice secretary Leila de Lima pawhin a lo chhui tawh a, mahse thubuai siamsakna tur khawp thil dik lo a hmu lo a ni, a ti. President chu president a nih laia a thil tih dik loh hmang chauhin a chungthu ngaihtuah sak theih a ni, a ti.

President Duterte hian ruih≠hlo laka indo a puan meka beihpui an thlak dan UN-in a sawisel avangin, UN aṭanga inhnuhdawhah hial a lo vau tawh a ni.