SKorea-ah rorellai party inlungrual lo

South Korea Preident Park Geun-hye-i paithlak tuma hmalakna kalpui mek chungchangah rorellai, Saenuri Party member-te an inlungrual lo.

Parliament-a Saenuri Party member 30 chuang chu President Park-i chungah hian an lungawi lo a, party chhuahsanah an vau. Member lungawi lo zinga mi, Yoo Seung-min chuan Saenuri Party kaltlangin an ram siamṭhat hna chu thawh theih lohah an ngai tih a sawi. Member lungawi lo te hian December 27 hian an party aṭanga chhuah an tum thu an sawi a, member dangte pawh hmin ngei an tum tih an sawi bawk.

Member 35-teín party hi an chhuahsan a nih chuan, Parliament seat 300 awmnaah Saenuri Party hian member 90 vel chauh a nei thei dawn a, Democratic Party aiin member a nei tlem tawh zawk dawn a ni.

President Park-i hi a thuneihna hmang dik loah puhin, sorkara nihna pawimawh engmah nei lo a ṭhianṭha Choi Soon-sil-i chu sorkar inrelbawlna leh policy siam kawngah inrawlh tirah puh a ni a, hei bakah hian private firm-te chu Choi-i enkawl foundation pahnih tana sum tam tham tak thawhtirah puh a nih bawk.