Berlin beitute zawng zel

Germany police-te chuan Berlin bazar-a truck hmanga mipui pungkhawm chil a, mi 12 nunna latu chu man ngei tumin an zawng chhunzawm zel.

Thawhlehni-a pawi≠khawihna a thlen hnu khan police-te chuan rinhlelh thilah mi pakhat an man nghal a, mahse an mi man hian pawikhawihna thleng nena inhnamhnawihna finfiahna tur a nei lo a, chhuah leh nghal a ni. Police-te chuan pawikhawihnaa inhnamhnawih hi mi pakhat aia an tam theih thu leh, ralthuam pawh an neih a rinawm thu an sawi a, khawpuia venhimna pawh tihkhauh nghal a nih thu an sawi.

Islamic State (IS) firfiak pawl chuan Berlin-a pawikhawihna thleng hi an pawl member pakhat tih niin an sawi a, mahse thuchiang erawh an tarlang lo.

Berlin mayor Michael Mueller chuan khawpui chhungah venhimna khauh zawka kalpui nghal a nih thu leh, police duty pawh dah belh an nih thu a sawi. Bazar hmunahte pawikhawihna thleng tur vennan police-te chuan daidanna te an siam thu a sawi a, hemi rual hian mipuite chu chiai lo turin a chah nghal bawk.

Thawhlehni zan khan pawikhawihna thlenna bul, Kaiser Wilhelm Memorial Church-ah mitthi te sunna hun hi hman a ni.