US-in NKorea nena inbiak a remti
US special envoy Stephen Biegun chuan North Korea chu dawhkan kila inbiakna neihpui an remti tih a sawi.
North Korea lam hian tunhnai khan kumin chhung US chu hun an pe tih sawiin, kumin chhung ngeia ram pahnih inbiakna neih chu buatsaih turin US hi an nawr a ni. Inbiakna an neihpui loh chuan US chuan 'Krismas thilpek' a dawng ang tiin an lo vau tawh bawk.
Stephen Biegun hian NKorea thuchhuah siam tawh chu ṭul lo leh ṭha lo hleah a ngaih thu sawiin, US chuan thil tum an nei a, hun bituk erawh an nei lo tih a sawi. Hna thawh a hun tawh tih leh buaina chinfel a hun tawh thu sawiin, NKorea chuan biak pawh dan tur pawh an hria a, an inpeih thu a sawi a ni.
US president Donald Trump chuan NKorea an hrekna chu an nuclear programme an titawp vek a nih loh chuan an hlip dawn lo tih a lo sawi tawh a, NKorea lam pawh hian US chuan an pawm theih tur inremna a siampui loh chuan, kawng dang an dap dawn tih sawiin US an lo vau tawh bawk.
NKorea hian tunhnaiah missile a enchhin nasa a, hei hi US a nawrnaa ngaih a ni. Tunthla chhung ringawt pawhin ṭum hnih an enchhin leh tawh a, December 8 leh 14 khan enchhin lehin hemi vang hian US pawh hian inbiakna neihpui an remti ta nia ngaih a ni.
North Korea hotu-pa Kim Jong-un leh Donald Trump-te hian nikum June thla khan Singapore-ah inbiakna an nei a, kumin kumtir lam khan Vietnam-ah inbiakna an nei leh bawk. Hetichung hian ram pahnih inkar boruak hi a ṭha thei chuang lo a ni.