Iraq-ah IS-in sipai paruk an that

Iraq-a Diyala eastern province-ah Islamic State (IS)-ten security force-te beiin Iraq sipai paruk an thah bakah midang pali an hliam.

Provincial police officer chuan nimin khan hemi chungchangah hian thuchhuah siamin inbeihna thlen hun hi Pathianni zan kha a nih thu a sawi, al-Maqdadiyah khaw bula thingtlang khuaa sipai camp an bei a ni. al-Maqdadiyah hi Baghdad hmarchhak lam km 100 vela hlaa awm a ni a, Pathianni zana inbeihna thlengah hian an inkap nasa hle nia tarlan a ni bawk.

Darkar eng emaw zat an inkah hnuah security force lam ṭanpui tur an thlen belh avangin firfiakte hi an insaseng ta nia sawi a ni a, IS lamah hian thi emaw hliam emaw an awm leh awm loh tarlan a ni lo. Diyala province-ah hian beihpui thlak nasa viau mah se a chhehvel, Iran nena an inrina velah hian IS firfiak biru an la tam hle a, provincial capital Baquba hmar lama awm Himreen tlang velah an la biru nasa hle nia ngaih a ni.

Inbeihna hi a khat tawk hian thleng reng mah se Iraq-ah hian boruak hi a ziaawm chho ve zel a, 2017 kum chawhnu lama Iraq secu­rity force-ten IS an hneh vek tawh nia an puan hnu aṭang phei kha chuan pawikhawihna hi a thleng tlem ve telh telh bawk.