Zimbabwe vice president nupui an man

Zimbabwe vice president Constan­tino Chiwenga nupui, Marry Mubaiwa chu kar kal ta Inrin­ni tlai khan pawisa tichingpena puh leh exchange con­trol regulations kalha cheah puhin, Zimba­bwe anti Corruption Commission (ZACC) chuan an man.

Kum 38 mi Mubaiwa hi dan kalha US dollar 919,000 khawih chingpenah puh a ni a, heng pawisate hi bungrua lakluh nan South Africa-ah a thawn niin anti-corruption body chuan a tarlang. Nimin khan court-ah a thubuai hi ngaihtuah tura tih a nih thu ZACC thupuangtu John Makamure chuan a sawi. John hian thuthar thehdarhtute hriatah chanchin kimchang erawh engmah a sawi lang lo.

Zimbabwe president Emmerson Mnangagwa chuan ZACC chu he eirukna hi kumin chhunga chhui turin a hriattir a ni. ZACC hian October 2018 leh May 2019 inkar khan Mubaiwa hian South Africa-ah pawisa hi a thawn ngei a ni tih an tarlang a, he an puhna hi Mubaiwa hian a pha thung.

Mubaiwa leh a pasal, Zimbabwe vice president nilai Constantino Chiwenga hi kar hnih liam ta khan an inṭhen niin tualchhung media-te chuan an tarlang. Chiwenga hi Oesophagus natna avangin thla li chhung China-a a inenkawl hnuah, thla hmasa khan an ramah a kir leh a ni.